A gloria do Señor resplandeceu sobre ti - Is 60, 1-6

Epifanía do Señor

 MANUEL: 

DEUS CONNOSCO

Deus está

no ceo, na terra e en todas partes,

-dicía o catecismo vello-.

E nosoutros crémolo.

O querer de Deus

non é de quedarse no ceo,

rodeado de anxos e arcanxos,

de grandezas sen límite,

de coros solemnes con grandes orquestras,

mirando de vez en cando,

como sofren e loitan e rin

os fillos que fora coidando.

O querer de Deus é baixar

ata os sitios máis baixos,

ata as situacións máis ridículas,

ata as xentes menos tidas en conta.

Unha corte de bestas,

uns pastores a soldo,

un pai e unha mai rexeitados:

o ruxido da vaca por baixo

e o orneo do burro por alto

na orquestra da noite

á que atenden calados

as estrelas do ceo,

satisfeitas de ver o seu brillo aumentado

polo nova luceiro

sen orixe nin ocaso,

Xesús, recén nado.

Deus con nosoutros,

algo máis ca unha visita que pasa.

Unha presenza que nunca remata.

O gozo de Deus

é estar entre a xente para todo,

sen nada que o asuste,

sen nada que o torne,

sen nada que o espante.