A21. A túa misericordia, Señor, é para sempre; non abandones a obra das túas mans - Salmo 137

Domingo 21 de Ordinario - ciclo A

CREO EN XESÚS DE NAZARÉ

Pai, que estás no Ceo,

que a túa luz alume as nosas dúbidas,

e ensínanos gratis a ver en Xesús,

o rostro do teu Fillo.

Que o teu don sexa máis forte

que a carne e o sangue que nos envolven.

Axúdanos a proclamar

que en Xesús de Nazaré,

pobre, obreiro, loitador, rezador,

cumpridor exquisito da túa vontade,

masacrado polos poderes políticos e relixiosos,

está a túa presenza viva no medio de nosoutros.

Xesús, mestre querido,

fonte primeira da que xurdiu a Igrexa, 

coida o noso Papa,

coida os crentes todos,

axúdanos a facer Igrexa con humildade,

sen seguridades soberbias no noso futuro,

co convencemento de que nunca o teu Espírito morrerá

no seo da comunidade que te invoque.

Espírito Santo amigo,

ilumina os que teñen as chaves do ceo

- e pode algún home ter as chaves do ceo? -

que abran e pechen soamente,

onde ti abres e pechas

coa túa misericordia máis forte có xuízo.