O meu cáliz beberédelo - Mt 20, 20-28

Día do Apóstolo

NO DÍA DA PATRIA

Dálle un aloumiño á Patria: coa súa luz, ves ti a luz.

Dálle un alento á Patria para que medre.

Dálle unha aperta á Terra: nela pisas, brincas, choras, fas medras.

Dálle conforto á Terra para que terme.

Dálle un abrazo a Galicia: deuche un pobo e o pobo deuche un ser.

Dálle alegría a Galicia para que alente.

Dálle agarimo ao Pobo: deuche a fala e a fala deuche a chave para entender.

Dálle pulo ao teu Pobo para que alente.

Dálle un bico á túa xente: ela deuche a graza dun cantar.

Dálle forza á túa xente para que cante.

Dálle un viva á túa Patria: deuche os fíos e o tear do teu vivir.

Dálle vida á túa Patria para que ande.

Dálle amor a Galicia: deuche nome e camiño,ser e poder ser.

Dálle festa a Galicia para que goce.

Por fidelidade a ti propio: ama a Galicia que é algo teu coma ti es dela.

Por fidelidade aos defuntos: ama o pobo e a cultura que deixan.

Por fidelidade aos vivos: non debilites ese corpo vivo que é o pobo e a súa lingua.

Por fidelidade aos que virán: déixalles o regalo dun pobo vivo, un fogar para ser humanos e ser irmáns.

Por fidelidade á humanidade: non deixes que se empobreza perdendo a cultura galega que lle pertence.

Por fidelidade a Deus: creador, amante e inspirador de vida, soamente se lle adora coidando a vida, aquí, galega.

Cando sofre o pobo,

sofres ti con el,

e se o pobo loita,

loitas ti con el,

e se o pobo baila,

bailas ti con el.

O meu pobo, sofre, loita, baila,         

e eu quero estar con el.