É necesario que sexa exaltado o Fillo do Home - Xn 3, 13-17

Exaltación da Santa Cruz A

CANTEMOS A NOBREZA

DESTA LOITA 

Cantemos a nobreza desta loita,

o triunfo de Xesús no seu madeiro;

parecía vencido e en derrota

e gañaba para o mundo o amor primeiro.

Doído o noso Deus da nosa perda,

do noso padecer tanto pecado,

quixo nacer humano nesta terra

para vencer connosco o asoballo.

Nacido de María nun presebe,

amigo foi do humilde desprezado;

dereito sementou e o seu empeño

conduciuno a morrer axustizado.

Maldicido e cuspido polos homes,

mantivo firme o amor que nos libera,

co perdón e coa fe foi o máis forte,

aínda que en cruz o máis débil parecera.

Bendicímoste, cruz, que es unha fonte

da vida nova en Cristo solecida,

con Xesús entrañado á nosa sorte

xa non espanta a morte nin a vida.

Ti recórdasnos, cruz, unha alegría,

o teu madeiro, un gozo que renova;

Deus con nós loita porque nos estima;

contigo e El vencemos desde agora.

Sen semente non dan froito as terras,

non se apañan colleitas sen suores,

tampouco sen traballos se fan festas

nin se fan sen a cruz tempos mellores.

Por iso te adoramos, cruz bendita,

sinal de vida en Cristo conquistada,

sinal do camiñar dos que confían,

sinal da fe da Igrexa rescatada.

A Deus que con amor terma da historia

que é Pai, Fillo e Espírito, loanza,

a quen volve coa cruz unha esperanza

de salvación e vida, sexa a gloria.