Dáte presa, Señor, en socorrerme - Salmo 39

Domingo 20 de Ordinario - ciclo C

OXALÁ QUE ARDA O MUNDO

Oxalá, Pai bo, oxalá,

oxalá que o lume do teu Espírito

me colla e me purifique,

me faga limpo e transparente

coma a luz dos amenceres primaverais.

Oxalá que arda o mundo

en lapas roxas de irmandade,

avivadas pola ansia permanente

dos pobres, dos pequenos, dos pecadores!

Oxalá que se rompan todas as cadeas

e que todos sexamos fondamente libres

para sementar liberdade

con cada unha das nosas diarias mudanzas!

Oxalá que medre a paz

cimentada nas rexas bases da xustiza,

e que sexan moitos os que a traballen

a través de todos os conflitos!

Oxalá que te amemos, Pai,

e que o teu amor acenda en nós

a laparada eterna da solidariedade

coa que honrarte humildemente en toda hora!