Deus sobe entre aclamacións, o Señor, ao son de trompetas - Salmo 46

Domingo 7 de Pascua, ciclo C - Ascensión do Señor

SALMO PARA AGRADECERLLE  DEUS

A SÚA COMPAÑA DE CADA DÍA

Que gusto dá espertar

coa túa luz cada día

e ir contemplando as cousas

coas que encher a vida!

Que gusto verte a ti nelas

rompendo a noite co día!

Na nai que coida dos nenos,

os mantén e os arroupa

para que vaian medrando

con ilusión e con forza

eu véxote a ti, Pai noso,

mimador da xente toda.

No labrego apaixonado,

loitador comunitario,

que busca no pan a paz

e a forza para o seu traballo

vexo a Xesús defensor

da dignidade dos baixos.

En cada gromo que agroma,

en cada herbiña que apunta,

en cada flor que xa asoma,

no nacer dunha leituga

vexo o Espírito de vida

que á vida feliz me empuxa.

Que gusto dá espertar

e verte nas cousas todas!

Que gusto dá traballar

para que a xustiza as envolva!

Que gusto dá espertar

e cantar a túa gloria!