Naquel tempo será salvado o meu pobo - Dn 12, 1-3

Domingo 33 do Tpo. Ordinario - ciclo B

CANDO A MORTE 

VISITE AS NOSAS TENDAS

Se perdo a man familiar

que me daba compaña e calor,

encontrarei en Ti outras mans

que quenten o corazón.

Se non chega ó meu oído

a voz familiar do amigo,

terei a túa voz de Pai

que me chamas coma fillo.

Se os meus ollos se pechan

á bonitura desta terra,

abriranse para sempre á fermosura

dunha terra nova e eterna.

Se parto deste mundo angustiado

por non ter feito o que quixera,

serás para min perdón e novidade,

encherás de plenitude a miña espera.

Se os choros rodean o meu corpo

cuberto coa tristura da ausencia,

sei que andarei sen tordear

no camiño da ledicia ventureira.

Se chora pola orfandade

a xente que tanto estimo,

estarei máis preto dela

porque vivirei contigo.

Contigo hei sementar calor no mundo,

contigo hei traballar pola irmandade,

aínda que marcho do mundo estou ben certo

que non me arredo del, pois Ti o abran­gues.

Nada perderei,

ninguén para min será ausente.

Canto son, amo e busco

atopareino en Ti cumpridamente.