A34. O Señor é o meu pastor, nada me falta - Salmo 22

Domingo 34 de ordinario - Cristo, Rei do Universo

A RAXEIRA DE DEUS

A raxeira de Deus, sol que nos cura,

vai enchendo de risa e regalía

o que antes era noite e estreitura.

O sol é Xesucristo, mediodía

de Deus, e rei de toda criatura

que queira renacer para a alegría.

Rei triunfador, pois revelou a altura

do cariño de Deus sen retesía,

para o humilde, na fe, pura tenrura.

Rei vencedor da morte que oprimía

co medo mesto toda sepultura:

Dános na fe a súa valentía.

Rei defensor da acusación que, dura,

contra nós polas faltas se volvía:

na fe a todos san da con dozura.

Rei creador, misterio de enerxía,

que polo amor, con nós, xa dá feitura

á nova humanidade, novo día.

A Deus, Trindade santa e unión segura,

na fe que cara ao Reino sempre guía,

A Igrexa dálle loanzas con fartura.