8 mar. 2014

Día da Muller Traballadora

 Hoxe, Día da Muller Traballadora (como se non traballásemos o resto do ano) é o momento de lembrar ás mulleres que abriron camiño, no noso caso podemos lembrar con orgullo a figura como muller e crente a nosa Concepción Arenal. Aprendeu leis vestida de home e escribiu tamén con seudónimo para poder aprender e manifestar as súas ideas e mellorar a vida dos presos, o seu valor e corazón foron finalmente recoñecidos... e actualmente bastante esquecidos. 


Aproveitemos paa recuperar a súa figura e a de tantas mulleres que traballan e melloran o mundo desde a penumbra.

Ilustración de : Leandro lamas



--------------------------------

Á beira 
 8 de marzo
 MAMEN HERNÁNDEZ, currocorre@yahoo.es
 MADRID.

Hoxe, como tantos días, as mulleres alzamos a voz reclamando un espazo que por xustiza nos pertence. Durante toda a semana deixaremos o anonimato, incluirásenos en cálculos e censos, sumaremos, terásenos en conta, farannos visibles; os nosos logros, as nosas conquistas, as nosas batallas serán obxecto de reflexión e informes, sacarase á luz os dereitos que se nos negan, as oportunidades das que somos privadas, a equidade pola que loitamos.

Debería de encher de rubor que no século XXI, teñamos que seguir fomentando accións que combatan a discriminación cuxo orixe radica no simple feito de nacer mulleres, que sexamos noticia por reclamar o mesmo salario, o acceso a empregos en condicións dignas, a aplicación de proteccións de acordo a certas responsabilidades; en definitiva, que se nos sinale por reivindicar a plena igualdade, un dereito inherente, un principio que nunca tivo que cuestionarse. Queremos estar á beira, non debaixo nin encima, senón á mesma altura que calquera outro ser humano.

Hoxe, como tantos días, sinto que en min viven miles de mulleres, mulleres de terra, de choiva, de aceiro; mulleres que cuestionan, que vacilan, que comezan; mulleres asilo, mastro, compás; mulleres que son pan, que son paz, mulleres estada (andamio) que constrúen o futuro, sen medo, valentes; mulleres que afastan da súa boca estereotipos, mulleres memoria.


E a Palabra vai por diante, mostrando o camiño a quen non ve, abrindo a escoitala ao que fai oídos xordos, despegando os beizos de quen cala: 
«Xa non hai xudeu nin grego, escravo nin libre, home nin muller, senón que todos vós sodes un só en Cristo Xesús» Gálatas 3, 28. 

(Eclesalia Informativo autoriza e recomenda a difusión dos seus artigos, 
indicando a súa procedencia).



 Probablemente hoxe sexa o día de comezar a profundizar sobre o papel da muller na Igrexa e a Teoloxía da muller, a chamada "feminista", sen desconfianza, con esperanza e sen medo, se temos realmente clara a igualdade da muller no noso mundo actual, non debemos deixar de escoitar a visión de Deus desde as mulleres, abramos mentes e corazóns...

No hay comentarios:

Publicar un comentario