Ao espertar, saciareime da túa presenza, Señor - Salmo 16, 1. 5-6. 8b e 15

Domingo 32 de ordinario -ciclo C

GRAZAS, DEUS DA VIDA

Por me chamares á vida

e a todas as súas posibilidades.

Grazas, Deus da vida!

Por me amares e creares nos meus pais,

cun amor elemental e comprometido.

Por me faceres fillo de Galicia,

herdeiro dunha marabillosa tradición humana.

Por me bautizares en ti,

no teu amor de Pai, Fillo e Espírito.

Por me abrires ao amor

na familia, no grupo, na comunidade.

Por me faceres capaz de traballar, de amar e de servir,

co gozo de facelo en comunidade.

Por me introducires pouquiño a pouco, con paciencia,

na novidade permanente do Evanxeo.

Por me faceres irmán de pobres e pecadores,

a min, que son pobre e pecador tamén.

Por me faceres partícipe da túa Igrexa,

solidario con ela no pecado e na misericordia.

Por me dares un amor de parella na vida,

escola diaria do teu amor universal e eterno.

Por seres o meu Pai

agora e para sempre.