22 sept. 2015

VII Semana Cine Espiritual en Galicia

Meñique e o espello máxico

(2014) Ernesto Padrón. Duración: 78 minutos.
Clasificación: Todos os públicos.

            Meñique é a historia dun pequeno campesiño que quere sacar a súa familia da pobreza. Unha praga de insectos que destrúe a colleita do campo onde vive, e o encontro co Espello Máxico da Media Laranxa, son os sucesos que o levarán á aventura. O Espello revélalle quen é a muller dos seus soños e anímao a ir á cidade xunto aos seus irmáns, Paulo e Pedro.

            De camiño cara á cidade, Meñique e os seus irmáns danse de conta de que un enorme carballo encantado ten o Palacio do Rei nas tebras e sen auga. Así o pequeno enfrontarase a un bosque encantado, e nel terá que conseguir tres obxectos máxicos: a machada Hachibaldo, o pico Picoretto e a fonte de auga con forma de noz chamada Señora Arroio. E será o espello máxico quen lle ensinará a usar a súa intelixencia para vencer todos os obstáculos.

            Ao redor da cidade, unha enorme favela é o fogar dos pobres. E unha misteriosa ladroa rouba no palacio para repartir o botín entre os seus habitantes. Ela tamén roubará o corazón de Meñique e poñerá en dúbida a predición do Espello da Media Laranxa. Finalmente o pequeno campesiño triunfará no empeño de cortar a árbore, abrir o pozo, vencer un xigante, derrotar a bruxa e conquistar a súa amada. Todo grazas á axuda dos seus amigos máxicos e porque finalmente aprende que “o saber pode máis que a forza”.

            Película cubana con cancións para nenos escritas por Silvio Rodríguez baseada nunha adaptación do conto de “Polgariño” relido polo heroe da independencia cubana José Martí. Permite achegar temas como a superación das dificultades, a verdadeira sabedoría, a solidariedade cos pobres e a axuda desde máis aló.

Recomendada: 1º,  2º  e  3º  de Primaria.

__________________________________________


La canción del mar

 (2014) Tomm Moore. Duración: 93 min.
Clasificación: Todos os públicos

A lenda celta dos nenos - foca contada desde a historia dunha familia. Logo da desaparición da súa nai, Ben e Saoirse son enviados a vivir coa súa avoa á cidade.

Cando deciden volver á súa casa xunto ao mar, a súa viaxe convértese nunha carreira contra o tempo a medida que se internan nun mundo que Ben só coñece a través das historias e as cancións que lle narraba a súa nai. Pero este non é un conto para durmir; estas criaturas levan no noso mundo demasiado tempo. Ben axiña se decata de que Saoirse será a clave para a súa supervivencia.
 
            Sobre o fondo dun relato fantástico amósasenos a forza do perdón, a fraternidade como relación básica, a importancia da familia e a aceptación das perdas.

Recomendada: 4º a 6º Primaria.

 __________________________________________


Trash. Ladrones de esperanza.
  
(2014) de Stephen Daldry. Duración: 114 min.
Clasificación: Non recomendada menores de 12 anos.

Desde as favelas de Brasil chéganos esta aventura de tres mozos que se enfrontan á corrupción política e policial coa única arma da súa honestidade e a axuda dun vello sacerdote e unha voluntaria norteamericana. Cine - fábula de denuncia sobre as desigualdades sociais e onde a fe é un motivo para a esperanza e onde o diñeiro non ten a última palabra.

            Un trío de mozos, interpretados con frescura, coraxe e autenticidade por Rickson Tevez, Eduardo Luís e Gabriel Weinste, atopan unha carteira que os levará a descubrir unha trama de corrupción e onde, coa axuda dun sacerdote (Martin Sheen), xeneroso pero canso, e unha voluntaria ben intencionada (Rooney Mara), se enfrontan un político aspirante a alcalde (Wagner Moura) e a un policía corrupto (Selton Mellon) que forman parte dunha trama organizada.

            Este canto á bondade móstranos como a última palabra non a ten o diñeiro nin o poder, senón que desde o mesmo lixo poden xurdir as flores que xeren posibilidades e novidade no noso mundo. Neste sentido a coherencia da fe aparece como un baluarte de resistencia no padre Juilliard, que sempre está aí aínda que lle falten as forzas. Os mozos teñen a fe da xente sinxela feita de frescura insolente e lúcida capaz de vencer todos os perigos. A cruz aparece asociada á loita contra a inxustiza en varios momentos e os personaxes que abren futuro sempre a teñen detrás.


Recomendada: 1º a 4º de ESO.

No hay comentarios:

Publicar un comentario