No aniversario do Concilio 6 - Aos traballadores

AOS TRABALLADORES

Ao longo do Concilio, nós os Bispos católicos dos cinco continentes, reflexionamos conxuntamente, entre moitos temas, respecto das graves cuestións que expón á conciencia da humanidade as condicións económicas e sociais do mundo contemporáneo, a coexistencia das nacións, o problema dos armamentos, da guerra e da paz. E somos plenamente conscientes da repercusión que a solución dada a estes problemas pode ter sobre a vida concreta dos traballadores e das traballadoras do mundo enteiro. Así, desexámonos, ao termo das nosas deliberacións, dirixirlles a todos eles unha mensaxe de confianza, de paz e de amizade.

Fillos moi queridos: estade seguros, desde logo, de que a Igrexa coñece os vosos sufrimentos, as vosas loitas, as vosas esperanzas; de que aprecia altamente as virtudes que ennobrecen as vosas almas: o valor, a dedicación, a conciencia profesional, o amor da xustiza; que recoñece plenamente os inmensos servizos que cada un no seu posto, e nos postos frecuentemente máis escuros e menos apreciados, facedes ao conxunto da sociedade. A Igrexa séntese moi contenta por iso, e pola nosa voz agradécevolo.

Nestes últimos anos, a Igrexa non deixou de ter presentes no seu espírito os problemas, de complexidade crecente sen cesar, do mundo e do traballo. E o eco que atoparon nas vosas filas as recentes encíclicas pontificias demostrou como a alma do traballador do noso tempo marcha de acordo coa dos seus máis altos xefes espirituais.

O que enriqueceu o patrimonio da Igrexa con esas mensaxes incomparables, o Papa Xoán XXIII, soubo atopar o camiño cara ao voso corazón. Mostrou claramente na súa persoa todo o amor da Igrexa polos traballadores, así como tamén pola xustiza, a liberdade, a caridade, sobre as que se funda a paz no mundo.

Deste amor da Igrexa cara a vós, os traballadores, queremos, tamén pola nosa banda, ser testemuñas preto de vós e dicímosvos con toda a convicción das nosas almas: a Igrexa é amiga vosa. Tede confianza nela. Tristes equívocos no pasado mantiveron durante longo tempo a desconfianza e a incomprensión entre Igrexa e a clase obreira, e sufriron a unha e a outra. Hoxe soou a hora da reconciliación, e a Igrexa do Concilio invítavos a celebrala sen reservas mentais.

A Igrexa busca sempre o modo de comprendervos mellor. pero vós debedes tratar de comprender o que é a Igrexa para vós, os traballadores, que sodes os principais artífices das prodixiosas transformacións que o mundo coñece hoxe, pois ben, sabedes que se non as anima un potente sopro espiritual farán a desgraza da humanidade en lugar de facer a súa felicidade. Non é o odio o que salva ao mundo, non é só o pan da terra o que pode saciar o fame do home.

Así, pois, recibide a mensaxe da Igrexa. Recibide a fe que vos ofrece para iluminar o voso camiño; é a fe do sucesor de Pedro e dos dous mil Bispos reunidos en Concilio, é a fe de todo o pobo cristián. Que ela vos ilumine. Que ela vos guíe. Que ela vos faga coñecer a Xesucristo, o voso compañeiro de traballo, o Señor, o Salvador de toda a humanidade.