Eu ámote, Señor. Ti es a miña forza - Salmo 17

Domingo 31 ordinario - ciclo B

PARA VIVIR CON MOITO AMOR

Señor, Pai do ceo e da terra,

ti es o noso Deus,

ti es o noso único Señor,

soamente en ti atopamos vida

e sustento derradeiro.

Queremos amarte, Pai,

como Xesús te amaba:

con todo o afecto de que somos capaces,

con todo o alento que levamos dentro,

con toda a intelixencia,

con todas as forzas.

De mañá ata a noite

mediante todas as nosas palabras e accións

ese é o noso empeño verdadeiro:

ser amados por ti e amarte,

ser servidos por ti e servirte,

ser coidados por ti e coidarte.

Queremos amarte no próximo,

en cada persoa veciña;

queremos buscar o seu interese e felicidade

co mesmo afán co que buscamos o noso.

Esa foi a ensinanza de Xesús, Pai,

e nesa ensinanza queremos permanecer fieis

grazas a ti.