Vivamos ou morramos, somos do Señor - Rm 14, 7-9

Domingo 24 do Tpo. Ordinario - ciclo A

ABRAZO DE PERDÓN

Que gozo comezar contigo o día

Pai de paciencia e fonte de promesa,

saber de teu perdón, do teu abrazo,

do teu poder para darnos vida plena!

Precisas testemuñas do respecto,

que á xente e mais ao mundo ti lle gardas,

apóstolos reclamas da alegría,

que Cristo rexurdido nos regala.

O Espírito nos dás para que poidamos

con bágoas ou con risos rexurdirmos,

o Espírito de fe, raíz e cumio

da paz e da obediencia do teu Cristo.

Conta con nós, Paiciño de tenrura,

Deus poderoso, conta coa túa Igrexa,

envíanos no día que se abre,

obreiros da túa paz a esa tarefa.

           

(Diurnal da Liturxia das Horas)