Ave María, a oración de Advento e Festividade da Inmaculada Concepción

Non podía faltar nestas datas a principal e máis sinxela oración de María, en especial para os nenos da catequese. Co noso agradecemento especial ós nosos amigos de http://dibujosparacatequesis.blogspot.com.es/

FESTIVIDADE DA 

INMACULADA CONCEPCIÓN

PREGARIA Á VIRXE MARÍA

Salve, Virxe bendita, María

Salve, Raíña de ceos e terra.

Salve, Arca sagrada que encerra

as bondades que o bo Deus nos fai.

De xeonllos prostrado ás túas plantas,

suplicante, contrito, che pido

que me mires cal fillo querido,

que me mires con ollos de amor.

Ti, que es o consolo dos tristes,

dá remedio ós meus fondos pesares.

Ti, que es luceiro dos mares,

alumea no meu corazón.

Fai, Señora, que todos os homes

poidan ser da túa gloria testigos,

e dá a todos os meus inimigos

paz, amor, caridade e perdón.

Fai, Señora, que nunca os erros

teñan casa no meu pensamento.

Non te apartes de min un momento

cando o demo me veña tentar.

Fai que a alma, que toda che entrego,

chegue ó ben porque tanto suspira,

e perdoa a moi torpe lira

que che canta esta pobre canción.

Porque quero gozar dos consolos

da católica fe en que creo,

porque quero despois ir ó ceo,

para decote as túas gloria cantar.

BENDITA SANTA MARÍA

Alegre por Deus e fonte

de incomparable alegría,

bendita santa María!

Repleta de amor de Deus,

nel gozando cada día,

bendita santa María!

Porque Deus Pai te visita

en gozosa romaría,

bendita santa María!

Cavilando no gran Deus

que a ti se achega en porfía,

bendita santa María!

Porque xeraches un fillo

para os pobres regalía,

bendita santa María!

Pobre por dentro e por fóra,

rica no Deus que acollías,

bendita santa María!

O imposible da irmandade

atopa en ti ampla vía,

bendita santa María!

Escraviña do Deus bo,

e do que Deus máis quería,

bendita santa María!