A Ti, Señor, elevo a miña alma - Salmo 24

Domingo 1 de Advento - ciclo C

O CRUCEIRO DO MONTE

Na soidade do cume da montaña,

rogando ao ceo, bendicindo a terra,

solemne, maxestoso,

érguese a cruz de pedra.

A luzada do día,

subindo dos liñares en ringleiras,

vana bicar, devotas,

as líricas lavercas.

Á caída da tarde, as badaladas

da campá da aldea

esvaécense ao seu redor, esmorecidas,

coa dozura tristeira

das bágoas, das lembranzas, dos martirios,

das divinas arelas.

Cando a pedra, durmida e acochada

da Terra - Nai no agarimoso seo,

esperta do seu sono milenario

e quer ser oración e pensamento,

florece nun varal, estende os brazos

e, póndose de pé, faise cruceiro!

Ramón CABANILLAS (1876-1959)