Quen son eu para que me visite a nai do meu Señor? - Lc 1, 39-45

Domingo 4 de Advento - ciclo C

NO COLO DE MARÍA

María, nai de esperanza,

nai de todos os que esperan,

contigo agardamos o Nadal,

contigo desexamos ver nacer entre nós

o que ha ser o noso Salvador.

María, nai humilde

da humilde esperanza,

que nos ensinas a valorar o pouco e o pequeno,

contigo sentímonos unidos a todos os pequenos

que levan no seu seo

a forza de algo novo que ha nacer,

ao seu tempo, con paciencia.

María, nai humilde e leda

da esperanza humilde e leda,

que levaches a Deus en ti

coma gozo dunha promesa certa,

contigo, en ti,

queremos bañar con risas

as nosas pequenas esperanzas diarias,

ata o día grande da grande Esperanza.

María, nai humilde, leda e crente

de todas as esperanzas humildes,

de todas as esperanzas ledas,

de todas as esperanzas crentes,

que te fiaches sempre de Deus,

contigo, en ti,

queremos medrar na fe

e poñer nas mans soñadoras de Deus

as nosas vidas precisadas de alboradas frescas.