Todos verán a salvación de Deus - Lc 3, 1-6

Domingo 2 de Advento - ciclo C

UN MANDADO DO MEU SEÑOR

Eu son un mandado,

un mandado do meu Señor.

Se escoitase no silencio

a palabra do meu Deus,

que me fala nos desertos,

que me fala nos rebumbios!

E certo: Deus fala,

Deus fala,

Deus quere falar comigo.

Se o dese escoitado!

Teño que preparar con xeito

os camiños do meu Señor.

corre présa que o faga,

pois está a chegar.

Xa o sinto,

petando á miña porta. Xa o vexo,

espallando a súa presenza

polos rostros dos meus veciños.

Xa o adiviño

tras cada esperanza morta,

tras cada esperanza resucitada.

Preparareille ao Señor o seu camiño

xunto cos meus irmáns,

para que chegue a min,

ás fonduras do meu corazón,

coa súa salvación.

Preparareille ao Señor o seu camiño,

xunto cos meus irmáns,

para que chegue a este Terra,

ás fonduras desta Terra,

coa súa salvación.

E todos veremos un día

en cada corpo encadeado,

e nesta Terra aflixida,

a salvación do noso Deus.