Sandou ós enfermos de varias doenzas - Mc 1, 29-39

Domingo 5 Tpo. Ordinario - ciclo B

A TAREFA DE XESÚS

Cada día,

a luz do amencer

daba paso á mesma tarefa de sempre,

soamente anovada

coa ilusión dunha estima fervente.

Cada día,

correr as vilas e aldeas,

falar cos veciños

anunciando que aquilo cambiaba,

que chegaba a hora dos febles,

que algo novo se estaba facendo.

Cada día,

tocar á velliña con febres,

erguela da cama

e sandar os enfermos doentes.

Cada día,

darlle cara ao mal traizoeiro,

proclamando con feitos

a desfeita dos demos trampulleiros.

Cada día

aceptar con contento

os servizos dos pobres,

irmáns nos traballos da vida,

irmáns nas loitas,

irmáns na esperanza

dun mañá mellor,

con renda mellor compartida.

Cada día

comer dese pan

a ninguén roubado,

pan sufrido e suado.

Cada día

sentarse a esa mesa,

e falar. .. e escoitar

coa alma en amores acesa.

Cada día

retirarse ao deserto,

e contarlle ao Pai dos humildes

as súas andainas do día,

os seus temores, adiantos e erros.

E aló no máis fondo,

no cerne da alma e da vida,

onde pousan os soños

e os amenceres teñen durmida,

escoitar a voz agarimosa

do Amigo fiel e sincero:

“Mañá é día novo,

durme e acouga,

compañeiro”.