CELEBRACIÓN PARA A FIN DA CATEQUESE

 É TEMPO DE COLLEITA

1. CANTO DE ENTRADA:   TEMOS UNHA FESTA

2. MONICIÓN DE ENTRADA:

Con alegría reunímonos hoxe para participar na recollida dos froitos da colleita da catequese deste ano. Coa esperanza do labrego que bota a súa semente e espera que un bo tempo lle axude a recoller moitos e bos froitos, así terminamos nós o curso que nos permite agora celebrar os froitos do noso traballo e darlle grazas a Deus.

3. PETICION DE PERDÓN:

1. Pedímosche perdón, Señor, por crear en moitas ocasións tormenta onde insultamos, pegamos e protestamos con malos modos.

2. Pedímosche perdón, Señor, polas veces que puxemos saraiba que golpeou aos nosos pais e profesores non sendo agradecidos e obedientes.

3. Pedímosche perdón, Señor, porque puxemos néboa ao noso ao redor que non nos deixou crecer en amizade, en responsabilidade, en agradecemento e amor aos demais

4. LITURXIA DA PALABRA

1ª LECTURA: De S. Paulo aos Filipenses, 4, 4-9

4Estade sempre alegres no Señor. Repítovolo: estade alegres. 5Que todo o mundo vexa o bos que sodes. O Señor está a chegar. 6Non desacouguedes por cousa ningunha. En todo presentádelle a Deus as vosas peticións con oracións de súplica e acción de grazas. 7E a paz de Deus, que supera toda intelixencia, custodiará os vosos corazóns e os vosos pensamentos en Cristo Xesús.

8Do resto, meus irmáns, todo o que sexa verdadeiro, todo o que sexa serio, todo o que sexa xusto, todo o que sexa enxebre, todo o que sexa estimable, todo o que sexa honroso, calquera virtude ou mérito que haxa, iso é o que debedes estimar. 9O que aprendestes, recibistes, oístes e vistes en min, iso é o que tedes que levar á práctica. E o Deus da paz irá convosco.

L/Palabra do Señor                           T/Grazas a Deus

SALMO RESPONSORIAL: (Do Salmo 67)

R. Lóente, os pobos, lóente os pobos todos Deus.

Deus se apiade de nós e nos bendiga,

amósenos a luz da súa presenza.

Que se coñezan na terra os seus camiños

e en todos os pobos a súa salvación.

Alégrense e canten as nacións,

porque ti gobernas os pobos rectamente

e guías na terra as nacións.

O agro dá os seus froitos,

bendinos o noso Deus.

Que Deus nos bendiga e que o teman

os confíns todos do mundo.

L/Palabra do Señor                           T/Grazas a Deus

Canto Interleccional: ESCOITA Ó SEÑOR

EVANXEO: (Xn.15, 1-8)

Lectura do Santo Evanxeo segundo San Xoán

1Eu son a verdadeira vide, e meu Pai é o labrador. 2O bacelo que en min non leva froito, arríncao; e o que leva froito, límpao, para que leve máis froito aínda. 3Vós xa estades limpos, pola palabra que vos teño falado. 4Permanecede en min e eu en vós.

Así como o ramo non pode levar froito pola súa conta, se non permanece na vide, vós tampouco, se non permanecedes en min. 5Eu son a vide; vós os bacelos. Quen permanece en min e eu nel, ese leva froito abondoso, pois fóra de min non podedes facer nada. 6Se alguén non permanece en min, é coma os ramos arrincados fóra, que secan; apáñanos, bótanos no lume e arden. 7Se permanecedes en min e as miñas palabras permanecen en vós, pedide o que queirades e hásevos facer. 8Nisto é glorificado meu Pai: en que levedes froito abondoso e vos mostredes coma discípulos meus.

L/Palabra do Señor                           T/Loámoste, Cristo

HOMILÍA

5. PETICIÓNS:

Sacerdote: Compartindo a nosa vida con Xesús, rogamos a Deus que nos axude a ser fíelles testemuñas do seu amor.

Facemos agora as peticións e contestamos todos: Pedímoscho de corazón.

1.Xesús, querémosche pedir que nos axudes a ser as túas mans para axudar aos demais.

Pedímoscho, Xesús.

2.Xesús, querémosche pedir que nos axudes a ser o teu sorriso para comunicar a todos a túa alegría.

Pedímoscho, Xesús.

3.Xesús, querémosche pedir que nos axudes a ser o teu corazón para querernos como irmáns.

Pedímoscho, Xesús.

4.Xesús, querémosche pedir que nos axudes a ser os teus pés para chegar a quen nos necesite.

Pedímoscho, Xesús.

5.Xesús querémosche pedir que nos axudes a ser a túa voz para gritar que Deus nos ama.

Pedímoscho, Xesús.

Sacerdote: Escoita, Señor, as nosas peticións e axúdanos para que as fagamos realidade na nosa vida de todos os días. Por Xesucristo o noso Señor. Amén.

6. OFERTORIO: EIQUÍ ESTÁN, SEÑOR

SÍMBOLOS:

(Tres nenos portan cada un unha cartolina cun froito que leva escrito algunha actitude positiva) Outro leva unha cesta de froitas variadas.

Monición: Señor, hoxe vimos con alegría cos froitos que nos deches. Queremos que na nosa vida non falten os froitos de amar, agradecer e crecer.

1. O FROITO DO AMOR: Ofrecémosche, Señor, os momentos de amizade e amor entre nós como froitos que creceron en bo clima.

Grazas polos amigos!

2. O FROITO DO AGRADECEMENTO: Recibimos moitas cousas, Señor por iso ofrecémosche o froito do agradecemento aos nosos amigos, pais, profesores e a todas as persoas que nos fixeron o ben durante o curso.

3. O FROITO DO CRECEMENTO: Eu crecín, eu crezo, eu crecerei. Queremos seguir recollendo este froito nos anos que quedan por vir. Seguimos contando coa túa axuda e a dos nosos pais e catequistas. Queremos crecer en estatura, en intelixencia, en responsabilidade e en amor a todos.

SACERDOTE:   Acolle, Señor estes bos desexos nosos como resposta ao amor que Ti nos tes.

CANTO DE OFERTORIO: CRISTO NON TEN MANS

7. SANTO: O SEÑOR NOSO DEUS

8. CANTO DA PAZ: A PAZ ENTRE NÓS

9. CANTO DE COMUÑÓN: TI ES CAMIÑO

10. MONICIÓN FINAL

Chegamos ao final deste curso de catequese. Ao longo destes meses descubrimos que Deus é o noso Pai e que formamos parte dunha gran familia, a Igrexa. Xuntos habemos ir coñecendo a Xesús e o que é máis importante fixémonos os seus amigos. Por iso agora, para rematar a nosa celebración, imos cantarche unha vez máis :

CANTA LEDICIA ESTAR CONTIGO