Cantas veces comedes e bebedes, anunciades a morte do Señor - 1 Cor 11, 23-26

Corpus Christi - ciclo C

PREGARIA:  ADORACIÓN

Adórote, Xesús, porque escolliches

o pan, que é manxar de cada día,

para fartarnos de ti, da túa vida,

e facerte para nós Eucaristía.

Adoro o teu Corpo e o teu Sangue,

ofrenda dun amor sacrificado,

no que eu cos irmáns cabo de min

me vexo en Deus tan ben reconciliado.

Adórote, Xesús, agradecido,

porque chegas ao fondo do meu ser

para bateres coas miñas indixencias

e ateigalas co teu forte querer.

Adórote, Xesús, cando me chamas

e me invitas á solidariedade

cos pobres desta terra onde ti esixes

unha pronta e real fraternidade.

Adórote, Xesús, en cada pobre,

e nas miñas pobrezas permanentes

onde ti, camiño, verdade e vida

te fas para o noso ben sempre presente.