O Pobo de Deus celebra a Pascua ao entrar na terra prometida - Xos 5, 9a. 10-12

Domingo 4 de Coresma - ciclo C

NA FESTA DO PAI

Veño á túa festa, Pai,

veño á túa festa.

Sei que non son merecente dela,

pero veño á túa festa,

porque sinto que ti me invitas.

Cantas veces estraguei coas miñas mans

as oportunidades que ti me deches

para construír a miña vida e a dos máis!

Dáme vergonza cruzar a soleira

e entrar, pero entro,

porque sinto que ti me invitas.

Cantas veces tamén ollei

de esguello e con desprezo

aos meus irmáns aos que ti queres tanto!

Cantas veces me vin xusto e perfecto

mentres ti saías cada mañá ao camiño

na procura dos fillos que amabas tenramente!

Cantas veces me despreocupei

dos que padecen abuso e marxinación!

Sei que non debía pasar esta porta,

pero veño á túa festa,

porque sinto que ti me invitas.