Velaí que vas concibir no teu ventre e dar a luz un fillo - Lc 1, 26-38

Domingo 4 de Advento - ciclo B

O CAMIÑO DOS POBRES

Ai, meu Deus, meu Deus,

quen me dese espertar cada mañá 

co saúdo do teu anxo,

invitándome á alegría máis completa,

recordándome a túa presenza grande e sa,

que me envolve en abrazo de cariño fiel!  

Quen me dese tamén

sorprenderme e verme sorprendido,

turbado, abraiado, desconcertado,

descubrindo o teu amor gratuíto por min,

aínda que son pouca cousa e pecador,

sen moitas ideas e posibles!

Quen me dese igualmente

que o corazón non me collese dentro

ó ver como ollas e escolles

as persoas e grupos dos pequenos

para introducir no mundo a forza do imposible,

que vai tirando barreiras

e anunciando o día da irmandade!

Quen me dese, meu Deus,

quen me dese verme arrastrado por ti,

por Santa María de Nazaré

e por moitos máis coma ela,

polo camiño dos pobres con espírito,

polo camiño dos pobres unidos e confiados,

polo camiño dos verdadeiros creadores de porvir!

Quen me dese! Pero. .. Imitando a María,

fiado no poder do teu Espírito,

que ti repartes gratuitamente, proclamo:

Velaquí a escrava do Señor,

cúmprase en min o que ti queiras.