Levantareime e irei onda meu pai - Salmo 50

Domingo 24 Ordinario - ciclo C

O DEUS DE XESÚS

Postos a facer imaxes

de como é Deus co perdido,

púxonos diante Xesús

a dun pastor aflixido,

que cruza montes e vales

buscando con grande présa

a ovelliña aparvada

que no monte se perdera.

E logo que deu con ela,

volve cheo de contento,

coa súa ovelliña ao lombo,

cansado, sen moito alento,

mais tan cheo de ledicia,

que fai no barrio unha festa

para celebrar a presenza

da ovelliña que perdera.

Deste Deus falou Xesús,

este é o Deus dos cristiáns:

un Deus que acolle os ruíns,

que come a gusto cos malos.

Postos a facer imaxes

de como é Deus coa perdida.

púxonos diante Xesús

a da muller aflixida,

que acende as luces axiña

e barre a casiña enteira

buscando con moito tino

a moeda que perdera.