Marta acolleuno. María escolleu a mellor parte. - Lc 10, 38-42

Domingo 16 de Ordinario - ciclo C

                        SENTADO AOS PÉS DO SEÑOR

Aos teus pés, Señor,

aos teus pés póñome eu tamén,

como María,

para escoitarte e amarte.

Veño onda ti

co corazón cheo de cariño,

porque estou coma namorado de ti,

porque estou engaiolado das túas cousas,

porque me encanta todo o que ti fas e ensinas.

Aos teus pés estou, Señor,

para aprender de ti

o tempero fondo da vida,

para aprender de ti a asentar a miña vida

no único realmente necesario.

Eu creo en ti, Señor,

eu creo na capacidade que ti tes

de encher a miña vida,

de darme toda a densidade necesaria

para ser fondamente feliz.

Aos teus pés estou, Señor,

coas mans e co corazón abertos,

e cos deportivos a carón,

disposto a andar canda ti

os camiños solidarios de Deus.