O meu cáliz beberédelo - Mt 20, 20-28

Día do Apóstolo - 25 de xullo

HIMNO (II vésperas)

O alustro nas olladas,

nas palabras o trono:

Leva o santo Patrono

todo o reino do Ceo nas pegadas.

Hai noites estreladas

no seu soño, un destino,

un bastón peregrino

e á beira do solpor, redes botadas.

Hai corazón de lume,

e unha roibén erguida

coma un cáliz, ferida

na que reborda do martirio o zume.

E unha igrexa, a galega,

barca de pedra dura,

que medra sen fisura,

ata acoller o mundo na bodega.

Agora que o solpor

destece nas ladeiras

as luces derradeiras,

Apóstolo Santiago, soñador,

dille dos soños nosos ó Señor.