Vós sóde-lo meu rabaño, eu xulgo entre ovella e ovella - Ez 34, 11-12. 15-17

 Domingo 34 Cristo, Rei do Universo - ciclo A

QUEREMOS VER A XESÚS

Señor,

queremos buscarte neste mundo insolidario e frío.

Queremos atoparte nos barrios marxinais e nos arrabaldes.

Queremos verte nos que a nosa sociedade agocha e esquece.

Queremos descubrirte nos que non contan para a cultura dominante.

Queremos acollerte nos que non teñen o básico e o preciso.

Queremos acariñarte nos que pertencen á cruz da historia.

Nos pobres e marxinados de sempre,

nos emigrantes e parados sen abrente,

nos drogadictos e alcohólicos sen presente,

nas mulleres maltratadas,

nos anciáns abandonados,

nos nenos indefensos,

na xente estrelada,

en todos os feridos e abandonados á marxe do camiño.

Neles queremos buscarte, atoparte, verte,

descubrirte, acollerte e acariñarte.