Día de Tódolos Santos

Bo día para lembrar con agarimo

aos nosos santiños no ceo,

eses que non aparecen nos santorais

pero que levamos no corazón...

Lecturas do día:

Pai Deus,

sentimos ledicia "lembrando",

pasando polo corazón, aos nosos antepasados e familiares defuntos;

sentimos ledicia

porque nos podemos presentar diante túa

apoiados e recomendados por persoas moi queridas,

cuxos nomes están escritos para sempre no libro da vida.

Dámosche grazas, Señor, polas nosas raíces,

por aqueles que nos puxeron neste mundo que é o teu mundo.

Como a árbore sedenta de altura e profundidade ao mesmo tempo,

afundimos as nosas raíces na terra nai

e seguimos mirando con esperanza e alegría o horizonte da vida,

ese ceo que lentamente imos facendo posible na nosa historia.

Dámosche grazas, Señor,

porque atopamos e seguimos atopando na nosa vida

persoas de corazón transparente, amantes da paz,

cheos de misericordia, desexosos de xustiza, sinxelos de corazón...

Dámosche grazas, Señor, por toda a xente de boa vontade,

e pola bondade que puxeches en cada un de nós,

bondade en parte traballada e en parte recibida.

Señor, que a súa claridade invada os nosos corazóns,

que a súa sinxeleza nos envolva coa súa forza.

Señor, que a súa transparencia nos ilumine,

que a súa xustiza nos axude a vivir como irmáns.

Señor, que a súa esperanza abra nosos limitados horizontes,

que a súa oración nos encha de paz persoal e familiar...

Eles son, Señor, o mellor testemuño da túa presenza entre nós.

E con Todos os Santos e os nosos familiares defuntos,

seremos capaces facer realidade o que eles nos ensinaron,

para gloria túa e felicidade de todos e cada un de nós. Amén.

Isidro Lozano L.

xa nos tes aqui