A miña carne é verdadeira comida, o meu sangue é verdadeira bebida - Xn 6, 51-58

Corpus Christi - ciclo A


XESÚS TERMA DO MEU PAN

O teu pan terma do meu pan, Xesús,
teu amor terma do meu amor,
a túa entrega terma da miña entrega,
a túa vida terma da miña vida,
para sempre.

Que son eu sen ti, Xesús?
Folliña liviá que leva o vento.
Pinga de orballo que ensome aterra.
Pauciño seco que non dá reverdecido.
Ti es o meu sustento, a miña vida,
en ti me apoio sempre.

Xesús, pan, amigo,
contigo cabo min
amarei máis, servirei mellor,
escoitarei con máis paciencia,
razoarei mellor as cousas,
formareime con máis ansia,
aturarei con aguante as parvadas,
protestarei con forza diante dos abusos,
acompañarei con máis agarimo
e intelixencia os marxinados,
aturarei mellor os fracasos comunitarios,
serei máis limpo e honrado sempre,
estarei máis alegre e feliz.

Contigo cabo de min,
serei un pouco máis coma ti mesmo fuches,
vivirei por ti e polas túas cousas
coma ti viviches e vives por min e polas miñas.

Cabo de min,
seremos amigos, seremos un.




Comentarios

Publicacións populares