Confesión de fe do pobo elixido - Dt 26, 4-10

Domingo 1 de Coresma - ciclo C

SÓ TI ES O MEU DEUS

Escóllote a ti, meu Deus,

escóllote a ti, coma Xesús.

Coma El quixer eu amarte,

coma El quixer eu levarte

no fondo e na tona de min mesmo,

dándolle forza e sentido a todo canto planeo e fago.

Ti es o meu Deus e o meu todo,

Ti es o centro da miña vida,

todo en min depende de ti,

todo en min mira amorosamente cara a ti.

Nas horas da miña debilidade e pobreza

gustaríame gozar do poder da túa presenza.

Nas horas difíciles da escolla e da decisión

gustaríame sentirte preto.

Cando me tente o espírito malo

que hai en min e no mundo,

quixer estar fondamente asentado en ti.

Cando me provoquen o poder, a fama e os cartos,  

quixer proclamar con toda a forza

que só Ti es o meu Deus.

Cando me tente a abandonar

as cousas da comunidade

e a ollar só para o meu insolidariamente,

quixer descubrir en ti as fontes

que invitan ao amor grande e solidario.

Meu Deus, meu corazón, meu todo,

alento que de min termas,

acougo e gozo diario, meu Deus!