Paz convosco (Pasados oito días, veu Xesús...) - Xn 20, 19-31

Domingo 2 de Pascua - ciclo C

A PRESENZA DE XESÚS RESUCITADO

Dános, Señor, a paz da xente humilde,

non a paz sufrida e derrotada,

dános unha paz valente e forte,

dános unha paz resucitada.

Arríncanos o medo que nos priva

de darlle fronte á xente que nos tripa,

e fainos decididos na ousadía

por unha vida nova, limpa e rexa.

Pois que somos de ti os enviados

para facermos cousas grandes en Galicia,

líbranos ti do mal do desespero,

fuxa de nós a praga da preguiza.

O teu Espírito, forza e paz a un tempo,

sobre nosoutros baixe en abundancia,

e con el o poder comunitario

para sermos dos vencidos esperanza.

De entre nós, aos que son desconfiados,

aos medosos, covardes, preguiceiros,

dálles fe, curador de humanos males,

dálles forza, dos frouxos menciñeiro.

Na loita polo pan que nos sustenta,

no medio dos traballos desta vida,

que saibamos, Señor, gardarche tempo,

que medre así o amor que nos anima.

Felices os que cren nun mundo novo

con persoas e pobos diferentes,

a pesar da maldade que coñecen,

felices, si, felices eses crentes.