Liberou a vida do pobre da man dos malvados - Xer 20, 10-13

Domingo 12 de Ordinario - ciclo A

NON TEÑAS MEDO

Non teñas medo – diche Xesús-,

non lles teñas medo,

non lles teñas medo aos que ocultan a verdade,

ou non a buscan sinceramente,

aos que co arma da mentira proveitosa

queren dominar os pobos e as persoas.

Rebélate –diche Xesús-

manifesta nun lado e noutro

a túa crenza fonda na irmandade,

adquirida ao abeiro de Deus Pai

ao lado de Xesús e da comunidade.

Fai desa crenza un gozo persoal diario

e una forza de reivindicación

nun mundo convocado desde moitas partes

á insolidariedade máis ampla e total.

Non lles teñas medo – diche Xesús-

aos que poden castigarte por iso;

privarte daquel posto de traballo,

retirarte aquel apoio ou influencia,

facerche mal nos teu bens ou propiedades,

ou incluso matarche o corpo.

Non lles teñas medo.

Fíate de Xesús, fíate do Pai;

todos os pelos da túa cabeza están contados;

nin o máis pequeno esforzo pola fraternidade no pobo

se perderá sen sentido e sen proveito.

Sé Valente, loita, non teñas medo,

fíate de Deus a fondo;

estás vertendo a vida

no proxecto máis limpo e venturoso,

por ti e polo pobo.

Non teñas medo.