Oracións de Advento

A COROA DE ADVENTO

1º Domingo de Advento

Acendemos, Señor, esta luz

neste primeiro domingo de Advento,

para manternos espertos e en pé,

como sentinelas espelidos,

ante o Fillo do Home que vén,

o Futuro glorioso que nos agarda,

a espertar a nosa débil e adormecida esperanza.

Espértanos, Señor,

para avistar aos desesperados da vida,

para poder ver os que só esperan

cousas menores que eles mesmos,

para entrever os que non teñen

ou perderon a ilusión en Ti

para divisar os que teñen o seu futuro

cargado de dúbidas e increnza ...

Señor, para que na nosa contorna

sexamos testemuñas claras da túa luz

e motivos cribles de esperanza,

Marana tha,ven Señor Xesús!

2º Domingo de Advento

Desexamos, Señor,

con esta segunda luz que acendemos,

que intensifiques o resplandor do teu rostro

para os que viven en tebras

e en sombras de morte.

Que a Luz da túa presenza,

alumada nas nosas vidas,

nos faga percibir as nosas orgullosas altiveces

e os nosos abismos de pecado

Equilibra e achanda as nosas vidas, Señor,

e fainos camiños de acceso cara a Ti

para os homes en desterro,

afastados de Ti e dos irmáns.

Señor, para que sexamos contigo

luz atraínte e sedutora,

Marana tha,ven Señor Xesús!

3º Domingo de Advento

Acendemos, Señor, esta terceira luz

máis próximos xa á noite boa da Luz Maior.

Queremos dar testemuño da túa Luz, Señor,

como fixo Xoán o Bautista,

Non somos nós a Luz, pero si as testemuñas

da Luz verdadeira vinda a este mundo

Desexamos, Señor,

con esta terceira luz que acendemos,

que o lume do teu Espírito

acenda os nosos corazóns

e os converta en luminarias para os demais.

Dános un corazón que vexa

as necesidades do noso próximo

para compartir con el o mellor que somos e temos.

Queima na túa fogueira, Señor,

toda a palla das nosas vidas

e reúne os nosos grans en pan comunitario

para renacer en Belén, a Casa do Pan.

Para que Te revelemos

como boa e gozosa Nova para os homes,

tan necesitados de recoñecerse como fillos de Deus

no Berce comunitario de Belén,

Marana tha,ven Señor Xesús!

4º Domingo de Advento

Acendemos, Señor, esta cuarta luz,

redobrando o noso desexo de chegar,

limpos e irreprochables,

ao teu gran Día sen ocaso.

Oh Deus, restáuranos;

que brille o teu rostro e nos salve.

Necesitámoste, Cristo, a Ti,

Luz Viva e Verdadeira,

para aclarar e iluminar os camiños

que nos conducen a Ti,

Camiño dos camiños humanos.

Acéndenos ti, Señor,

as nosas candeas que te esperan,

cargadas do aceite das nosas mellores obras.

Que Te alumemos, como María,

Aurora do Sol nacente,

nas nosas palabras e obras

para luz do mundo e dos irmáns.

Para que así sexa, Luz de Luz,

Deus verdadeiro de Deus verdadeiro,

Marana tha,ven Señor Xesús!