Domingo 31 de Ordinario B


PRIMEIRA Dt 6, 2-6
Escoita, Israel: amarás ó Señor de todo corazón
PROCLAMACIÓN DA PALABRA RECOLLIDA NO LIBRO DO DEUTERONOMIO

 Faloulle Moisés ó pobo dicindo:

Respecta o Señor, o teu Deus, gardando todos os seus preceptos e os seus mandamentos que eu che ordenei, ti e o teu fillo e mais o teu neto, todos os días da túa vida, para que se alonguen os teus días. 3Escoita, Israel, e ten coidado de o practicar, para que sexas feliz e que te multipliques moito, pois tal como cho falou o Señor, Deus dos teus pais, é unha terra que deita leite e mel.
4Escoita, Israel: O Señor, o noso Deus, é Iavé, o único. 5Amarás o Señor, o teu Deus, con todo o teu corazón, con todas as túas aspiracións e con toda a túa forza. 6Os preceptos estes, que eu che mando hoxe, estarán no teu corazón;


SALMO RESPONSORIAL Sal 17, 2-3a. 3bc-4. 47 e 51ab
R/ (2): Eu ámote, Señor, a miña forza

 2Eu ámote, Señor, a miña forza,
3Señor, a miña rocha, o meu castro, o meu refuxio,

meu Deus, penedo onde me acollo,
o meu escudo, o meu alcázar, o meu castelo.

4Eu invoco ó Señor, o adorable,
e salvarame dos meus inimigos.

 47Viva o Señor, bendita a miña rocha;
sexa exaltado Deus, o meu salvador,
51o que lle dá ó rei grandes victorias
e mostra misericordia ó seu unxido


SEGUNDA Heb 7 23-28:
Ten un sacerdocio imperecedeiro, xa que dura para sempre
PROCLAMCIÓN DA PALABRA RECOLLIDA NA CARTA ÓS HEBREOS

 Irmáns e irmás:

23Aqueles foron moitísimos sacerdotes, porque a morte non os deixaba ser duradeiros; 24pero este ten un sacerdocio imperecedoiro, xa que dura para sempre. 25Por iso pode levar á plenitude da salvación para sempre ós que por El se achegan a Deus, xa que en todo momento vive para interceder por eles.
26Pois era xustamente deste xeito o sacerdote que nós precisabamos: santo, sen ruindade e sen pecado, separado dos pecadores e levantado a unha gloria máis alta có mesmo ceo. 27Non necesita ofrecer sacrificios cada día, en primeiro lugar polos seus pecados e logo polos do pobo, coma os outros Sumos Sacerdotes; pois isto fíxoo dunha vez para sempre, ofrecéndose a si mesmo. 28En síntese, a Lei constitúe Sumos Sacerdotes a homes débiles, mentres que o xuramento que vén despois da Lei constitúe Sumo Sacerdote ó Fillo que logrou a salvación plena para sempre.


ALELUIA Xn 14, 23:
Se alguén me ama, gardará a miña palabra,
e meu Pai amarao, e viremos onda el


EVANXEO Mc 12, 28b-34:
Amara-lo Señor teu Deus. Amara-lo teu próximo
PROCLAMACIÓN DO SANTO EVANXEO SEGUNDO MARCOS

 28Un letrado, que oíra a discusión, decatándose do ben que lles respondera, preguntoulle:
‑¿Cal é o mais importante de todos os mandamentos?
29Xesús respondeulle:
‑O primeiro é: Escoita, Israel: o Señor é o noso Deus, o Señor é único,  30e amarás o Señor, o teu Deus, con todo o teu corazón, con toda a túa alma, con todo o teu entendemento e con todas as túas forzas.  31O segundo é: Amarás o teu próximo coma a ti mesmo. Non hai mandamentos máis importantes ca estes.
32O letrado replicou:
‑Moi ben, Mestre, estás no certo cando dis que El é único e non hai outro fóra del;  33e que amalo con todo o corazón, con todo o entendemento e con todas as forzas, e o próximo coma a un mesmo,  é mais importante do que todos os sacrificios e holocaustos.
34Xesús, vendo que respondera con moito tino, díxolle:
‑Non estás lonxe do Reino de Deus.
E ninguén se atreveu a facerlle máis preguntas.



Comentarios

Publicacións populares