Bendíganos o Señor tódolos días da nosa vida - Salmo 127

Domingo 27 ord - ciclo B

CANTO DAS CRIATURAS

Omnipotente, altísimo, bondadoso Señor,

son túas a loanza, a gloria e mailo honor,

só ti es merecente de toda bendición

e nunca é digna a xente de honrarte nos teus dons.

Loado ti por toda criatura, meu Señor,

e en especial loado polo irmanciño sol,

que aluma e abre o día cheíño de esplendor

e espalla polos ceos a voz do seu autor.

Pola irmanciña lúa, de branca luz menor,

polas estrelas claras que o teu poder creou,

tan limpas, tan fermosas, tan vivas como son,

e brillan polos ceos: loado, meu Señor!

Pola irmanciña auga, repleta de candor,

que é útil, casta, humilde: loado, meu Señor!

Polo irmanciño lume, que aluma ao se ilo sol,

e é forte, lindo, alegre: loado, meu Señor!

Pola irmanciña terra, que é toda bendición,

a irmá naiciña terra que dá en toda ocasión

as herbas e os froitos e flores de color,

e nos sustenta e rexe: loado, meu Señor!

E polos que perdoan e aturan con amor

os males corporais e a tribulación:

felices os que loitan en paz contra a dolor

porque lles chega o tempo da gran liberación!

Pola irmanciña morte: loado, meu Señor!

Ningún vivente foxe da súa obrigación.

Ditosos os que acollen de Deus o firme amor,

non vivirán a morte con desesperación.

Servídeo con tenrura e humilde corazón,

honrádeo con cantigas que aclamen os seus dons.

De Deus todo nos chega: cantade á creación.

As criaturas todas, loade o meu Señor!