Veña a nós, Señor, a túa misericordia, como de Ti esperamos - Salmo 32

Domingo 29 de ordinario - ciclo B

COIDADE VÓS DELES 

  (Semana de Loita contra a Pobreza)

Señor, cando che pidamos milagres

e ante o xentío famento

invoquemos a túa omnipotencia, vólvenos dicir:

COIDADE VÓS DELES

Señor, cando nos escandalicemos

das condicións inhumanas

nas que tantas irmás e irmáns estranxeiros

se ven obrigados a habitar, a traballar e a vivir,

vólvenos dicir:

COIDADE VÓS DELES

Señor, cando suframos ao ver os nosos anciáns

abandonados e sós na cidade,

vólvenos dicir:

COIDADE VÓS DELES

Señor, cando nos decatemos de que os nosos fillos

están enviciados mentres millóns de inocentes

non teñen o mínimo para sobrevivir,

vólvenos dicir:

COIDADE VÓS DELES

Señor, cando nos entristezamos ao ver

que aínda hoxe hai persoas excluídas

na Igrexa e pola Igrexa,

vólvenos dicir:

COIDADE VÓS DELES

Señor, cando comprobemos

que a auga e o aire están sempre contaminados,

que os animais son maltratados,

que as cousas se estragan,

vólvenos dicir:

COIDADE VÓS DELES

Señor, cando atopemos persoas

que necesitan o noso sorriso

pero non atopamos tempo

para pararnos a escoitar,

vólvenos dicir:

COIDADE VÓS DELES

Señor, cando nos sorprendamos

dos desequilibrios económicos do mundo

mentres que os nosos armarios están cheos de cousas inútiles,

vólvenos dicir:

COIDADE VÓS DELES

Señor, cando as nosas Eucaristías sexan máis vivas,

a nosa escoita da Palabra máis intensa,

o noso estilo de vida máis evanxélico,

queda connosco, Señor, e sigue dicíndonos:

COIDADE VÓS DELES