CELEBRACIÓN + ORACION - DOMINGO + SEMANA 4 CORESMA B

 

https://xanostesaqui.blogspot.com/search/label/Coresma%20B?m=1

Cuarto domingo de Coresma

Monición de entrada

Seguimos camiñando esta Coresma entre as mans abertas de Deus e a nosa liberdade para rexeitar o seu amor, que é rexeitar aos irmáns. O autor da primeira lectura chora por un pobo, unha terra e un pobo que xa non existen.

Rito penitencial

Ti, que nos chamas sempre. Señor, ten piedade de nós.

Ti, que abres as túas mans na Cruz. Cristo, ten piedade de nós.

Ti, que does do noso pecado. Señor, ten piedade de nós.

Ideas para a homilía

·         O autor da primeira lectura mira cara atrás, aos sucesos que padeceu Israel e chega a unha conclusión: a desgracia do pobo ven de darlle as costas a Deus.

·         É máis doado, sempre máis doado, o camiño da nada, da superficialidade, do “quéroo todo agora, xa, pronto”.

·         Pensar só no inmediato fainos miopes que non ven máis alá dos fuciños. No agora, no xa, non se atopa ao irmán.

·         Nada realmente importante é doado, todas as grandes decisións custan esforzo e traballo. E o esforzo e traballo fainos homes e mulleres. O doado non humaniza, non fai medrar.

Oración dos fieis

Oremos a Deus como pobo chamado a unha vida plena.

·         Pola Igrexa, chamada a ser experta en humanidade. Oremos:

·         Pola xente nova, que está buscando o seu camiño na vida. Oremos:

·         Polos nosos maiores, que con tanto esforzo construíron unha vida para si e para os seus. Oremos:

·         Por uns gobernantes que sexan homes e mulleres de paz. Oremos:

·         Por toda a xente que sofre a inxustiza e o egoísmo da sociedade. Oremos:

·         Pola nosa parroquia que ten que camiñar collida da man de Deus e de todos os nosos veciños. Oremos:

Escoita a oración do teu pobo peregrino por unha terra chea de esperanzas e de bágoas. Por Cristo noso Señor.

Ángel Domínguez Cerdeira

(grazas por compartir connosco)