VOLUNTARIADO XUVENIL VERÁN 2019

O Bispado impulsa tres campos de traballo                        Actúan con anciáns e discapacitados      FARO DE VIGO - Ourense

O Bispado de Ourense acolleu na xornada de onte a presentación dos Campos de Traballo organizados polo Sector de Mocidade do Movemento de Acción Católica Xeral. Seguindo a liña dos últimos anos, pon en marcha varias iniciativas para que os mozos de 14 a 30 anos teñan a posibilidade de vivir "unha experiencia diferente durante uns días do verán", achegándose a quen sofren exclusión, nun "proceso gradual e contando coa debida preparación, descubrindo o enriquecedor que resulta acompañar e axudar aos demais". Deste xeito, mozos crentes e non crentes comparten unha actividade que axuda tamén a romper fronteiras, nunhas xornadas nas que cobra importancia a convivencia e o contacto coa natureza.

Mozos de 14 a 18 anos traballarán con anciáns na Residencia Betania de Viveiro, en colaboración coas Irmanciñas dos Anciáns Desamparados, do 15 ao 21 de xullo, cun "prezo de 50 euros". Conta con 14 prazas dispoñibles.

O segundo, para mozos de 18 a 30 anos, traballará con persoas con discapacidade psíquica no Hospital San Pablo e San Lázaro de Mondoñedo, en colaboración coas Fillas da Caridade, do 31 de xullo ao 6 de agosto, abonando 50 euros. Dispón de cinco prazas.

O terceiro grupo, integrado por mozos de 23 a 30 anos, traballará con persoas inmigrantes. Está organizado polos misioneiros Javerianos, e Acción Católica colabora coa súa difusión e inscrición. Celébrase en Tetuán do 7 ao 19 de xullo, e en Misión Midelt-Tattiouine Atlas, Marrocos, do 19 de xullo ao 4 de agosto.

Rut Igrexas falou no acto de presentación, como representante de Acción Católica, sobre a experiencia enriquecedora que viviu no campo de traballo con anciáns en Viveiro. Gabriel Dasilva destacou o humor, a humildade e o servizo das persoas que o acompañaron no Campo de Traballo de Mondoñedo, con persoas con discapacidade psíquica.