NOVAS - 9 abril. 800 ANIVERSARIO DA CONSAGRACIÓN DA CATEDRAL DE SANTIAGO DE COMPOSTELA

   Con motivo dos 800 anos da conmemoración da consagración da nosa Catedral de Santiago de Compostela, o noso maior símbolo cultural e relixioso, os composteláns convídannos a celebrar este aniversario canda eles o próximo sábado día 9. 
  

 Este é un fragmento da carta do Consorcio de Santiago:

No ano 2011, a cidade vai celebrar o 800 aniversario da consagración da Catedral de Santiago de Compostela, unha nova oportunidade para manter vivo o efecto do ano Xacobeo que acaba de rematar, evento que representa en cada ocasión o encontro das administracións e dos cidadáns así como a posta en marcha de proxectos e actividades que inciden no crecemento e na proxección de Compostela como cidade Capital de Galicia e cidade de referencia europea. Por outra parte, favorece a consolidación dunha axenda cultural que xa é un referente para Galicia e no concerto das cidades de Europa e do mundo. A Catedral de Santiago cumpre neste ano 2011 nada máis e nada menos que 800 anos e para celebrar tal efeméride imos desenvolver un conxunto de accións, exposicións, concertos e intervencións no noso patrimonio que reforcen o proxecto de cidade. Un recurso importante para a difusión desta conmemoración é a elaboración dunha guía educativa na que a Catedral e o 800 aniversario se expliquen dun xeito didáctico e nos aproximen á historia da Catedral e á conmemoración da súa consagración. O motivo desta comunicación é dar a coñecer unha iniciativa que actúe como referente e dinamizador desta celebración. Trátase da organización dun acto social e lúdico de participación dos composteláns arredor do noso elemento patrimonial máis relevante: a Catedral. Queremos facelo a través dun acto que potencie o seu indiscutible valor histórico e Q. afecto que a ela nos une como un dos principais sinais da nosa identidade. Un acto que consiste en organizar un masivo ABRAZO CIDADÁN Á CATEDRAL DE SANTIAGO DE COMPOSTELA, O VINDEIRO SÁBADO DÍA 9 DE ABRIL, ÁS 13 HORAS.            Unha proposta destas características ten que amosar o recoñecemento que para nós representa a basílica compostelá e só se converterá nun éxito se entre todos e todas conseguimos rodear masivamente o perímetro da Catedral de Santiago. Sirva pois esta carta como un convite á participación individual e colectiva neste evento para o que lle prego que asista aos encontros organizativos que se convoquen con tal motivo. (...) Xosé A. Sánchez Bugallo Presidente do Consorcio da cidade de Santiago de Compostela

Se non podemos en persoa, estou segura de que os nosos corazóns estarán convosco.