Domingo 5 de Coresma B

PRIMEIRA Xer 31, 31-34

Establecerei unha nova alianza e non me recordarei do pecado

PROCLAMACIÓN DA PALABRA RECOLLIDA NA PROFECÍA DE XEREMÍAS

31Velaquí os días

-é o Señor quen fala-

nos que pactarei coa casa de Xudá e co reino de Israel

unha alianza nova;

32non coma a alianza que pactei cos seus pais,

o día no que os collín pola man

para os sacar do país de Exipto;

pois eles quebrantaron o meu pacto,

aínda que eu seguín sendo o seu Señor

-é o Señor quen fala-.

33Velaquí o pacto que eu hei pactar coa casa de Israel

despois deses días -é o Señor quen fala-:

Hei mete-la miña lei nas súas entrañas,

escribireina nos seus corazóns,

serei para eles o seu Deus,

e eles serán para min o meu pobo.

34Xa ninguén terá que instruí-lo compañeiro,

xa ninguén terá que instruí-lo seu irmán,

dicíndolle: "Respectade o Señor";

senón que todos eles me farán caso,

desde o máis noviño ó máis grande

-é o Señor quen fala-,

pois eu perdoaréille-la súa iniquidade,

e xa non me lembrarei máis dos seus pecados.

                 Palabra do Señor                             R/. Grazas a Deus

SALMO RESP. Sal 50, 3-4. 12-13. 14-15

R/ (12a): Crea, Deus, en min un corazón puro

3Apiádate de min, meu Deus, pola túa bondade,

pola túa misericordia, borra o meu pecado;

4lávame ben da miña iniquidade,

límpame da miña culpa.

12Crea, Deus, en min un corazón puro,

renóvame por dentro cun espírito firme.

13Non me botes da túa presencia

e non tires de min o teu santo espírito.

14Devólveme a alegría da túa salvación,

sostenme co espírito xeneroso.

15Ensinarei o teu camiño ós pecadores

e volverán a ti os descarriados.

SEGUNDA Heb 5, 7-9

Aprendeu a obediencia e fíxose autor da eterna salvación

PROCLAMACIÓN DA PALABRA RECOLLIDA NA CARTA ÓS HEBREOS

7Cristo, nos días da súa vida mortal, a fortes gritos e con bágoas, presentou oracións e

súplicas a quen o podía salvar da morte e Deus escoitouno por mor da súa submisión.

8Aínda que era Fillo, aprendeu sufrindo o que é obedecer; 9e, consumada deste xeito a súa

consagración sacerdotal, converteuse en causa de salvación eterna, para tódolos que lle

obedecen,

               Palabra do Señor                             R/. Grazas a Deus

VERSIÑO Xn 12, 26

Quen me sirve, que me siga, di o Señor;

e onde eu estou, alí estará tamén o meu servidor.

EVANXEO Xn 12, 20-33

Se o grao de trigo morre enterrado, dará froito abondoso

PROCLAMACIÓN DO SANTO EVANXEO SEGUNDO XOÁN

20Algúns dos que subían a adorar no día da Festa eran gregos. 21Achegáronse a Felipe, o

de Betsaida de Galilea, e pedíronlle:

-Señor, queremos ver a Xesús.

22Foi Felipe e díxollo a Andrés; Andrés e mais Felipe foron dicirllo a Xesús. 23Xesús

respondeulles:

-Chegou a hora de que sexa glorificado o Fillo do Home. 24Évos ben certo: se o gran de

trigo cae na terra pero non morre, quedará el só; pero se morre, dará froito abondoso.

25Quen ama a súa vida, pérdea; mais quen aborrece a súa vida neste mundo, poñeraa a

salvo para unha vida eterna. 26Se alguén quere servirme, que me siga; e alí onde estou eu,

estará tamén o meu servidor. Se alguén me serve, hao honra-lo Pai. 27Agora o meu espírito

está turbado. ¿E que hei de dicir: Pai, sálvame desta hora? ¡Pero se para iso cheguei a esta

hora! 28Pai, glorifica o teu Nome.

Chegou entón unha voz do ceo:

-Xa o glorifiquei, e glorificareino aínda de novo.

29O oílo o xentío alí presente, dicía que fora un trono; outros dicían: "faloulle un anxo".

30Xesús interveu dicindo:

-Esta voz non foi por min, senón por vós. 31Agora é o xuízo deste mundo; agora ó

príncipe deste mundo vano botar fóra. 32E eu, cando me ergan da terra, atraerei a todos

cara a min.

33Dicía isto, indicando de que morte había de morrer.

           Palabra do Señor                             R/. Loámoste, Cristo