Hante adorar, Señor, todos os reis da terra - Salmo 71

Epifanía - ciclo C

ORACIÓN DE EPIFANÍA

Que a festa da Epifanía, Señor, nos ensine

a percibir o nivel de marxinación e insolidariedade

que hai na pobreza do pobo.

Que non pechemos, Señor, a porta a ninguén.

Que nos poñamos a derrubar muros

e a tender pontes para que academos a graza

de que Xesús veña a nós.

Que saibamos ver a túa luz ao lado dos excluídos

e dos que non teñen un lugar neste mundo.

Que aceptemos esta opción como boa nova,

coma o teu camiño para salvarnos a todos.

Que teñamos ollos para ver a grandeza humana,

que a loita contra a marxinación e a pobreza

non sexa cousa de expertos e entendidos,

senón a unión de todas as forzas,

e que o Nadal, que está a punto de rematar, 

sexa eterno.