Domingo 3 de Advento - ciclo C

PRIMEIRA Sof 3, 14-18a

O Señor alegrouse por ti na louvanza

PROCLAMACIÓN DA PALABRA RECOLLIDA NA PROFECÍA DE SOFONÍAS

14Exulta, filla de Sión; berra lediciosa, Israel,

alégrate e relouca con todo o corazón, filla de Xerusalén.

15O Señor retirou o teu castigo, botou para atrás os teus inimigos.

O Señor será o rei de Israel no medio de ti, non volverás a ter medo da desgracia.

16No día aquel diráselle a Xerusalén:

Non teñas medo, Sión, que as túas mans non afrouxen.

17O Señor, o teu Deus, está no medio de ti, é un heroe que salva.

El salta de alegría por ti, embrúxate co seu amor,

dá brincos de alegría por ti.

18Eu aparteite da asemblea festiva; retirei de ti o seu ¡Ai!

SAL. RESP. Is 12, 2-3. 4bcd. 5-6

R/ (6): Exulta e canta louvanzas

porque no medio de ti está magnífico o santo de Israel

2Velaí, Deus é a miña salvación, terei confianza, e non medo.

El é a miña forza, por isto louvareino.

Si, o Señor é a miña salvación".

3Sacaredes auga con gozo das fontes de salvación.

Dade a coñecer entre os pobos os seus feitos,

facédelle a lembranza de que é grande o seu Nome.

 5Cantádelle ó Señor. De verdade fixo cousas magníficas,

que serán coñecidas en toda a terra.

6Clamade con gozo e ledicia, habitantes de Sión:

Que grande é no medio de ti o Santo de Israel".

SEGUNDA Flp 4, 4-7

O Señor está cerca

 PROCLAMACIÓN DA PALABRA RECOLLIDA NA CARTA DE SAN PAULO APÓSTOLO ÓS FILIPENSES

  

Irmáns e irmás:

4Estade sempre alegres no Señor. Repítovolo: estade alegres. 5Que todo o mundo vexa

o bos que sodes. O Señor está a chegar. 6Non desacouguedes por cousa ningunha. En

todo presentádelle a Deus as vosas peticións con oracións de súplica e acción de gracias.

7E a paz de Deus, que supera toda intelixencia, custodiará os vosos corazóns e os vosos

pensamentos en Cristo Xesús.

ALELUIA Coma no n. 7

EVANXEO Lc 3, 10-18

E nós que faremos?

PROCLAMACIÓN DO SANTO EVANXEO SEGUNDO LUCAS

10A xente preguntáballe a Xesús:

-E logo, que temos que facer?

11El respondíalles:

-O que teña dúas túnicas, que as reparta con quen non teña ningunha; e que faga o mesmo o que teña que comer.

12Foron tamén uns recadadores a se bautizar, e preguntáronlle:

-Mestre, que temos que facer?

13El contestoulles:

-Non esixades nada máis do que vos está mandado.

14Tamén uns soldados lle preguntaron:

-E nós, que temos que facer?

El contestoulles:

-Non asoballedes nin saqueedes a ninguén, e contentádevos coas vosas pagas.

15Como o pobo estaba esperando polo Mesías, empezaba a pensar se acaso non o sería Xoán; 16pero el declarou diante de todos:

-Eu bautízovos con auga, pero está a chegar o que é máis forte ca min, e a quen eu non son digno de lle desata-los amallós do seu calzado. El havos bautizar con Espírito Santo e con lume. 17Porque trae a forcada na man, para limpa-la súa eira e recoller na hucha o seu trigo; pero a palla ha de a queimar no lume que nunca apaga.

18Con esta e outras moitas exhortacións anunciáballe a Boa Nova á xente.