ORACIÓN DO DÍA MUNDIAL DE ORACIÓN E COIDADO DA CASA COMÚN

ORACIÓN PARA O TEMPO DA CREACIÓN

Creador de Vida,

pola túa Palabra a Terra produciu plantas que deron sementes,

e árbores de todo tipo que deron froitos;

os ríos, as montañas, os minerais, os mares e as fragas sostiveron a vida.

Os ollos de toda a xente ollaban cara a ti

para satisfacer as necesidades de cada ser vivo.

E ao longo dos tempos a Terra foi sostendo a vida.

Cos ciclos planetarios de días e estacións,

renovación e crecementos,

abriches a túa man

para lles dar ás criaturas a mantenza no momento axeitado.

Na túa Sabedoría concediches un día de Descanso (Sabbat),

un tempo bendito para descansar en gratitude por todo o que nos vas dando;

un tempo para liberarnos do consumo desenfreado,

un tempo para permitir que a Terra e todas as criaturas

descansen da carga da produción.

Pero nestes tempos a nosa vida está levando o planeta máis aló dos seus límites.

As nosas demandas de crecemento

e o noso interminable ciclo de produción e consumo

están esgotando o noso mundo.

As fragas esgótanse, a terra seca, os campos fallan,

os desertos avanzan, os mares acidifícanse, as tormentas intensifícanse.

Non permitimos que a Terra garde o seu Descanso,

e a Terra está loitando por se renovar.

Durante este “Tempo da Creación”

pedímosche que nos concedas valor de celebrar un Descanso para o noso planeta.

Fortalécenos coa fe para confiar na providencia.

Inspira a nosa creatividade para compartir o que nos foi dado.

Apréndenos a sermos persoas satisfeitas co necesario.

E, mentres proclamamos un Xubileu para a Terra,

envía o teu Espírito Santo para renovar a face da Creación.

No nome de Aquel

que veu proclamar a boa nova a toda a Creación,

Xesús Cristo.

Amén.