Aclama a Deus, terra enteira. - Salmo 65

Domingo 14 de Ordinario - ciclo C

PREGADE AO DONO DA SEARA

Que alegría ver cuberta a nosa terra

de xornaleiros do pan e máis da vida;

xente viva, apaixonada, xente leda,

que levante a esperanza esmorecida!

Ai, se houbese deles centos e milleiros,

que enchesen vilas, aldeas e cidades,

años sinxelos, ousados, cantareiros,

espidos de poder, doentes de verdade!

Quen será entre nós tan libre, tan valente,

que, sen pararse con nada no camiño,

portiña a porta vaia chamando á xente

para a festa da paz, no nome do Deus vivo.

Sería entón Galicia cousa distinta,

os corazóns florecían cal roseiras,

a paz sería en nós palabra viva

e a xustiza enchería as nosas leiras.

Xa que non valen os soños sen espertas,

xa que Deus é o dono dos seus froitos,

pidámoslle obreiros para a tarefa,

e ofrezamos sen receo os nosos lombos.