Quen, Señor, se hospedará na túa tenda? - Salmo 14

Domingo 22 de ordinario - ciclo B

REFLEXIÓN DE ACCIÓN DE GRAZAS

Polo teu amor tan fiel, por todo o ben que nos fas;

Pola vida que nos dás para que a poidamos coidar;

Polo mundo que nos deches, por todo o ben que nel hai.

Graciñas Deus da vida, graciñas Deus de amor.

Polo sol que cada día é fiel para nos alumar;

Pola auga que refresca e limpa sen nos mancar;

Por todo o noso corpiño, que é a túa casa principal.

Graciñas Deus de vida, graciñas Deus de amor.

Polos que están namorados e saben darse ós demais;

Polos amigos e amigas que alento e amor nos dan;

Polos que pasan traballos e saben con fe esperar.

Graciñas Deus de vida, graciñas Deus de amor.

Polos que curan violencias, polos que sementan paz;

Polos que sofren ofensas e souberon perdoar;

Polos que quitan abusos, polos que curan o mal.

Graciñas Deus de vida, graciñas Deus de amor.

Por toda a inmensa beleza da creación de Deus Pai,

Por Xesucristo bendito, mestre, salvador e irmán;

E polo Espírito Santo, que vén en nós habitar.

Graciñas Deus de vida, graciñas Deus de amor.

  

                                             (da Liturxia das Horas )