Os que fostes bautizados, revestístesvos de Cristo - Gal 3, 26-29

Domingo 12 do Tpo. Ordinario - ciclo C

 OS TRIUNFOS DE XESÚS

Non contes cun camiño de rosas

polo medio dos aplausos da xente.

Non contes con subir ao estrado do triunfo

entre bicos de mociñas louras

e medallas dos presidentes.

Se es un fiel seguidor de Xesús,

Se es un apaixonado pola comunidade,

vaite afacendo ás burlas,

aos desprezos e aos insultos,

vaite afacendo á persecución.

Chamarante desocupado,

chamarante comunista;

diranche que algo buscas para ti;

diranche que es bo,

pero que andas enganado;

e, cando xa non teñan nada que dicir,

dirán que es un soñador,

que pensas en cousas imposibles;

e deixarante só.

O importante non é triunfar.

Un cristián non nace xustamente

para ser un triunfador.

O importante é loitar,

ir botando a semente

no suco propio e no da comunidade,

con paciencia e esperanza.

O importante é ir dando a vida,

pouco a pouco, xenerosamente,

con moita alegría,

e agardar os imposibles da vida,

os imposibles de Deus.